Француската влада ги зголеми субвенциите за граѓаните кои ги заменуваат автомобилите на конвенционален погон со електрични велосипеди.
Владата нуди и до 4.000 евра за секој граѓанин кој ќе се откаже од транспортно средство што загадува и ќе избере почиста и поеколошка алтернатива.
За оние кои живеат во домаќинства со ниски приходи во урбаните зони со ниски емисии и кои се откажуваат од своите автомобили, достапна е субвенција од 4.000 евра за купување електричен велосипед. Иницијативата може да ја користат и оние кои сакаат да користат традиционални, немоторизирани велосипеди. Нешто помали субвенции се достапни за француските граѓани со повисоки примања.
Субвенциите првично беа воведени минатата година, но неодамна беа зголемени откако владините претставници сфатија дека треба повеќе да се направи за да ги стигнат Холандија, Германија и Данска. Француската влада сака 9% од земјата да премине на велосипеди до 2024 година, додека само 3% од земјата ги користи сега. Тој процент во Холандија е неверојатни 27%.
Политиката на француските функционери се заснова на моделот на програма во Литванија во која граѓаните имаат право на субвенција до 1.000 евра за купување нов електричен велосипед, скутер, мопед, мотоцикл или дури и кредит за јавен превоз во замена за нивното старо возило.
Франција не само што троши пари на индивидуални иницијативи, туку владата вети дека ќе инвестира 250 милиони евра за да го направи градот Париз „целосно пријателски настроен кон велосипедите“. Градоначалничката Ен Идалго беше реизборана на изборите минатата година и вети 130 километри нови велосипедски патеки во следните пет години.
Веста доаѓа неколку дена откако американскиот претседател Џо Бајден го потпиша Законот за даноци и клима, кој целосно го игнорира потенцијалот на електричните велосипеди за борба против климатските промени. Законот вклучува милиони долари даночни олеснувања за електричните автомобили, но нема стимулации за електричните велосипеди.
