Франција на 7 јуни ќе испрати нова Статуа на слободата во САД. Новиот споменик ќе пристигне во Њујорк на 4 јули – Денот на независноста на САД и, како што објави весникот Le Journal du Dimanche, ќе ги симболизира историските врски меѓу двете земји.
„Сакавме повторно да се поврземе со оваа француско-американска приказна“, рече амбасадорот на Франција во Вашингтон, Филип Етјен, додавајќи дека споменикот „е двоен симбол на слободата“.
Статуата ќе биде многу помала од нејзината постара „сестра“, достигнувајќи 2,83 метри висина.
Идејата, според наводите, се родила во јули 2019 година, па требало да им се покаже на САД дека „Франција останува верна на духот на пријателството“ меѓу двете земји и нивната заедничка историја. Франција ги поддржуваше американските колонии во нивната борба за независност против Англија во 18 век.
Сепак, проектот беше одложен поради пандемијата на COVID-19 и повторно стана актуелен зимава. Споменикот ќе биде поставен во градината на резиденцијата на францускиот амбасадор во Вашингтон, каде што ќе остане 10 години.
Статуата на слободата, што денеска може да се види покрај брегот на Њујорк, е подарок од Франција по повод првиот век од независноста на САД. Новиот гест на Париз доаѓа во време кога се забележуваат првите влијанија од власта на Џо Бајден врз односите меѓу САД и ЕУ. Тие, според некои познавачи, значително се подобриле, иако некои се жалат на постојаната „ексклузивност“ на САД.
