Откако Вардар синоќа победи во баражот и по двегодишна пауза се врати во најдобрата македонска фудбалска лига, навивачите ги пречекаа играчите на плоштадот „Македонија“ во Скопје.
Со убедливи 3:0 на неутрален терен во Кавадарци екипата на Вардар го совлада прволигашот Скопје и го испрати во втората лига воедно земајќи му го местото во елитата.
По триумфот фудбалерите доцна синоќа се вратија во престолнината каде верните навивачи, кои во голем број и беа на трибините во Кавадарци, им приредија дочек прво кај Порта Македонија, а потоа и на градскиот плоштад. Играчите и стручниот штаб продефилираа во панорамски автобус и беа поздравени од скопјани со бакљи, аплаузи и скандирања.
Можеби пласман од втора во прва лига не делува како нешто за вакво славје, но имајќи ја предвид беспарицата во клубот и една сезона во која играчите играа без да земаат плата, дефинитивно заслужија ваков пречек за подвигот што го направија.
Наредената 2023/2024 сезона Вардар по двегодишна пауза во втората лига ќе игра во првата лига.
