Победата над високопласираната Италија и поразот од Португалија ја одведоа македонската фудбалска репрезентација на 62. место на најновата ранг-листа на ФИФА која штотуку беше објавена.
Македонија одигра два бараж натпревари за пласман на Мундијалот во Катар. Прво ја совлада Италија на гости со 1:0, резултат кој ни донесе доста поени со оглед на одличниот рејтинг на „Аѕурите“ кои во натпреварот влегоа како шестопласирани. Потоа загубивме од Португалија на гости со 2:0, резултат кој не ни донесе поени.
Победата над Италија, патем актуелен европски шампион, направи Македонија да има 13,84 поени повеќе од последното рангирање и да скокне 5 позиции, закотвувајќи се на 62. место (досега бевме на 67. место). Ги рипнавме Албанија, Словенија, Јамајка, Конго ДР и Исланд.
Што се однесува до врвот на листата, Белгија конечно падна и сега Бразил е лидер. Иако Италија загуби од Македонија и со тоа изгуби 17,46 поени, сепак остана на 6. место. Во првите 10 Мексико успеа да ја надмине Холандија и да дојде до 9-тото место.
Германија останува надвор од топ 10.
Што се однесува до рангирањето на земјите од машиот балкански регион, Македонија е пред Словенија, Албанија, Црна Гора, Бугарија и Косово, додека многу малку пред нас е Босна и Херцеговина (3 места и 7,54 бодови).