Македонската фудбалска репрезентација забележа нов пад на светската ранг листа и сега се наоѓа на 74. место.
Трите нерешени натпревари во септемврискиот ФИФА прозорец за квалификациите за Мундијалот 2022 во Катар на Македонија ѝ донесоа само 2,55 поени повеќе од рангирањето минатиот месец. Нашата репрезентација сега има 1345,47 поени и поради скокот на други репрезентации оствари пад од две места.
За потсетување, Македонија одигра нерешено без голови дома со Ерменија и Романија, како и 2:2 на гости кај Исланд иако до 78. минута водеше со 2:0.
Во април и мај годинава фудбалерите беа на 62. место, но лошите резултати на ЕУРИ 2020 и трите нерешени сега си го направија своето.
Шанса за скок Македонија ќе има во прозорецот во Октомври кога прво гостуваме кај Лихтенштајн на осми, а потоа на празникот 11-ти Октомври ја пречекуваме Германија.
Рангирањето на сите репрезентации од нашата квалификациска Ј група изгледа вака:
- (14.) Германија 1627,8
- (42.) Романија 1451,8
- (60.) Исланд 1397,32
- (74.) Македонија 1345,47
- (89.) Ерменија 1262,4
- (188.) Лихтенштајн 910,94
Што се однесува до врвот на листата, има три промени во првите десет. Белгија остана прва со Бразил зад неа, додека Англија се проби на 3. место истиснувајќи ја Франција. Португалија ја симна Шпанија од 7. место, а Данска влета меѓу првите 10 вадејќи ги надвор САД, кои изненадувачки беа токму 10-ти во август.
