Младата женска репрезентација до 17 години славеше убедлива победа од 5:2 против селекцијата на Албанија на стартот од квалификацискиот турнир што се одржува во Драч.
Младите македонски фудбалерки поведоа во 13. минута со погодокот што го постигна Емили Митковска. Домаќинот на турнирот успеа во 33. минута да го израмни резултат преку Ера Метоџа. Минута подоцна Клеста Аго постигна гол за комплетен пресврт и предност на Албанија од 2:1. Слаѓана Ѓорѓиева во последната минута од првиот дел успеа да погоди за израмнување на 2:2.
Избраничките на селекторката Катерина Милеска одиграа феноменално второ полувреме, во кое успеаа да постигнат три гола и да комплетираат убедлив триумф над незгодната селекција на Албанија. Во 52. минута Јована Павловска погоди за предност на Македонија. Истиот играч во 72. минута се запиша повторно во лисата на стрелци, додека во 87. минута Васка Василева ги постави конечните 5:2.
Во 2. коло од квалификацискиот турнир во рамки на групата Б младите Македонки силите ќе ги одмерат со Косово, чии фудбалерки со високи 9:0 ја торпедираа репрезентацијата на Црна Гора.