Георгина Родригес веќе неколку години гостува на Канскиот филмски фестивал, а вчера на премиерата на француската драма „L'Été dernier“ (Минатото лето) се појави во креации на тунискиот дизајнер Али Каруи, со кои таа ги истакна нејзините карактеристични облини.
Шпанската инфлуенсерка пристигна во хотелот „Martinez“ во виолетова тоалета која ја следеше нејзината линија на телото, а за свеченото појавување на фестивалот и amfAR Gala избра малку поелегантно издание.
Партнерката на Кристијано Роналдо носеше златен блескав фустан кој беше украсен со стотици светки, дизајнирани од Али Каруи. Косата ја носеше во реп, а парчето облека што се влечеше зад неа ги истакна нејзините препознатливи облини. Изгледот го комплетираше со блескави обетки и неколку алки.
За amfAR Gala организирана од Фондацијата за истражување на СИДА, една од водечките светски непрофитни организации посветени на поддршка на истражувањето и превенцијата на оваа болест, таа избра црн миди фустан.
Исто така, ова парче беше украсено со светки. Црниот коктел-фустан без раменици имаше шлиц до бутовите, а исто така беше дизајниран од Али Каруи. Фустанот го усогласи со црни салонки со потпетици од Le Silla.
Родригес го комплетираше својот изглед со ѓердан со дијамантски и виолетови скапоцени камења, дијамантски прстен и нараквица од Chopard.
Ова не е првпат Родригес да соработува со Али Каруи. Во јануари, на доделувањето на Joy Awards 2023 година во Саудиска Арабија, инфлуенсерката носеше син фустан со качулка и долги ракавици дизајнирани од Каруи.
