Германија повеќе не зависи од увозот на енергенси од Русија, потврди германскиот министер за финансии Кристијан Линднер за BBC.
Тој тврди дека неговата земја целосно ја диверзифицирала својата енергетска инфраструктура од почетокот на руската инвазија на Украина во февруари минатата година.
„Да, се разбира дека Германија сè уште зависи од увозот на енергенси, но денес веќе не зависи од увозот од Русија, туку од глобалниот пазар“, рече Линднер, истакнувајќи дека нашле нови извори за снабдување со енергенси. Германија порано увезуваше околу половина од својот гас од Русија.
На Светскиот економски форум (СЕФ) во Давос, Линднер укажа на брзината со која е изграден нов терминал за течен природен гас во Германија, за рекордни осум месеци. Посочува дека планираат дополнителни инвестиции во инфраструктурата.
„Ова е само еден пример за огромна промена во германската политика“, рече тој.
„Сфативме дека мораме да ја зајакнеме нашата конкурентност по ерата на канцеларката Меркел. Таа ера беше фокусирана на силите од минатото, а сега ги развиваме силите на иднината“, рече германскиот министер за финансии. Тој е оптимист за податоците кои сугерираат дека инфлацијата во Германија го достигна својот врв минатата година.
