Министерството за надворешни работи на Русија ги објави деталите од разговорот со германскиот амбасадор во оваа земја, со кого разговарале за аудиоснимки на кои германски војници наводно разговарале за уривањето на мостот на Крим.
По разговорот со Александер Ламбсдорф, Министерството за надворешни работи на Русија соопшти дека побарале појаснување од германскиот амбасадор.
„Руското Министерство за надворешни работи побара појаснување од амбасадорот во врска со дискусијата во разговорот со високи германски офицери за можноста за снабдување на Киев со ракети од долг дострел Таурус, како и давање практична помош на вооружените сили на Украина во нивните борбени потреби против цели во Русија“, се вели во извештајот.
Тие исто така посочија дека овие наводи укажуваат на вмешаност на Западот, вклучително и на Берлин, во конфликтот во Украина.
Претставник на германското Министерство за одбрана изјави дека Федералната воена контраразузнавачка служба (BAMAD) ги презела сите неопходни мерки за да го истражи инцидентот.
Информацијата дека германските војници наводно зборувале за уривање на мостот на Крим, првпат во јавноста ја изнесе руската пропагандистка Маргарита Симонјан.
Германскиот канцелар Олаф Шолц целата ситуација ја нарече многу сериозна и рече дека германската влада работи на расветлување на инцидентот многу внимателно, интензивно и брзо.