Германскиот пазар на автомобили се очекува да закрепне оваа година, проценува Асоцијацијата на автомобилската индустрија (VDA), која очекува регистрирани околу 2,8 милиони нови автомобили.
Тоа би значело околу седум отсто повеќе нови автомобили на патиштата отколку во 2021 година, рече претседателката на здружението Хилдегард Милер.
Лани биле регистрирани 2,62 милиони.
Продажбата на патнички автомобили беше значително намалена поради доцнењето на синџирите за снабдување, особено на полупроводниците.
Милер рече дека проблемите веројатно ќе продолжат оваа година.
Германската автомобилска индустрија сè уште е далеку зад нивото пред пандемијата, според владините податоци кои покажуваат дека во 2019 година биле регистрирани 3,6 милиони нови автомобили.
Во средата, Милер повика и на забрзан развој на европското производство на полупроводници и батерии.
„Ако Германија сака да ја задржи својата позиција како лидер на светскиот пазар во иднина, таа мора веднаш да започне со изградба на полупроводнички постројки“, рече лидерот на VDA.
„Првичните планови за проширување на производството на батерии во Германија и Европа веќе постојат и важно е да се спроведат сега на краток рок за да може автомобилската индустрија во Европа да продолжи да создава нова вредност“, рече таа.