Организаторите на Мастерсот во Монтреал потврдија дека, судејќи по сè, Новак Ѓоковиќ годинава нема да може да настапи на турнирот.
Турнирот започнува на 8 август, а Ѓоковиќ не може да влезе во Канада бидејќи не е вакциниран.
Како што истакна директорот на турнирот Јуџин Лапиер, единствените опции за настап на Ѓоковиќ се тој да се вакцинира или Канада да му даде посебна дозвола за влез во земјата.
„Ќе имаме одличен турнир, таму ќе бидат сите најдобри играчи освен Ѓоковиќ и Зверев. Ги знаеме причините за нивното отсуство“, изјави Лапиер.
Зверев е повреден, додека Ѓоковиќ не може да влезе во Канада, а Лапиер не е оптимист за доаѓањето на Новак и потрагата по петтата титула на тој турнир.
„Или владата на Канада ќе ги промени правилата околу вакцинацијата или тој ќе се вакцинира. Мислам дека ниту едно од тие сценарија не е реално“, додаде Лапиер.
Покрај настапот на Мастерсот во Канада, од истите причини, под знак прашалник се настапите на Ѓоковиќ на турнирите во САД, особено на УС Опен, каде би се стремел да се израмни со Рафаел Надал по бројот на освоени Грен слем титули.
