Голем пожар синоќа го зафати и делумно го уништи Понте ди феро, индустрискиот, таканаречен Железен мост што ги поврзува двете римски населби Остиенсе и Портуенсе.
Пожарот избувнал синоќа пред полноќ, а пожарникарите успеале да го локализираат околу 1 часот утрово, јавува агенцијата ANSA.
Зоната на железниот мост е центарот на ноќните собири во Рим.
Според првичните информации, нема човечки жртви, а некои очевидци тврдат дека пожарот избувнал во бараките на бездомниците под мостот, по што е создадено стампедо од луѓе кои биле во околните ресторани и барови.
Како што јавуваат италјанските медиуми, пожарот загрозил и дел од гасните инсталации, а како мерка на претпазливост е исклучено снабдувањето со гас, електричната енергија и водата.
Градоначалничката на Рим, Вирџинија Раџа го посети местото на несреќата и изјави дека „најважно е што нема човечки жртви, но тажно е да се види дека е уништен дел од историјата“.
Пожарот изгоре дел од мостот кој се урна во реката Тибар, а останува да се утврди дали основната конструкција е оштетена или мостот ќе мора да се урне поради оштетување.
Индустрискиот мост е изграден во 1863 година од страна на белгиска компанија и неговата оригинална намена била железнички да ги поврврзе линиите Чивитавекиа со централната станица Термини. Изграден целосно од железо со 131,5 метар должина и 7,25 метри ширина, оригиналното име му е Понте дел'Индустриа, односно Индустриски мост.
