Иако тимот од Рим наведуваше дека периодот за рехабилитација на голгетерот Чиро Имобиле сѐ уште не е утврден, неколку извори од Чизмата уверуваат дека главната ѕвезда на римјаните нема да заигра пред Нова година.
Испитувањата кои 32-годишниот напаѓач ги направи утринава покажаа повреда на бицепсот која многу веројатно ќе го принуди да одмора до почетокот на 2023 година.
Gazzetta Dello Sport и Reuters пренесуваат дека италијанскиот репрезентативец нема да му биде на располагање за тренерот Маурицио Сари сѐ до почетокот на јануари.
Лацио има незгоден распоред до паузата поради Мундијалот во Катар бидејќи ќе се соочи со забревтаната Аталанта, Јувентус, како и градскиот ривал Рома, а воедно има и два натпревара од Лига Европа против Митјиланд и Фејнорд кои се со императив победа за тимот да продолжи во нокаут-фазата.
Италија не се пласираше на Мундијалот, па Имобиле секако немаше да игра на светскиот собир.
Имобиле е најдобриот стрелец на Лацио сезонава со 6 гола на 10 натпревари.
Има постигнато вкупно 189 голови на 273 натпревари по неговото доаѓање во Лацио од редовите на Севиља во 2016 година.
