По спроведеното истражување, научниците предупредија дека редовното земање лекови како вијагра значително го зголемува ризикот од проблеми со видот.
Српскиот уролог проф. д-р Александар Милошевиќ неодамна предупреди дека мажите во Србија веќе почнуваат да земаат вијагра уште во средно училиште, сакајќи да се докажат во кревет.
Имајќи го ова предвид, уште позагрижувачки се податоците од новото истражување објавено во стручното списание JAMA Ophthalmology, кое покажало дека употребата на инхибитори на фосфодиестераза тип пет може значително да го зголеми ризикот од проблеми со видот.
Кога велиме инхибитори на фосфодиестераза, тоа не значи ништо за повеќето од нас лаици, туку зборуваме за лекови како вијагра и други лекови за потенција. Истражувањата покажаа дека употребата на овие лекови го зголемува ризикот од одлепување на мрежницата, ретинална васкуларна оклузија и исхемична оптичка невропатија за 85%, а сите три од овие состојби може да доведат до слепило.
За потребите на студијата, научниците од Универзитетот во Британска Колумбија создадоа база на податоци од 213.033 мажи кои редовно земале вакви видови лекови од почетокот на 2006 година до крајот на 2020 година. Потоа ги споредиле здравствените проблеми на овие мажи со 4.584 други кои не земале редовно вакви лекови, по што дошле до споменатите резултати.
Сепак, експертите забележуваат дека ова е опсервациско истражување кое може да докаже поврзаност помеѓу овие лекови и проблемите со очите, но не докажува дека двете работи се причински поврзани. Од друга страна, напоменуваат дека на овој тип на лек не треба да се гледа како на „безопасни бонбони“, и дека доколку имате проблеми со еректилна дисфункција или што било друго, наместо да се „лекувате“ сами, да одите на лекар.
