На натпреварот против Рома голманот на Емполи направи серија од три одбрани во еден ист напад, а онаа последната медиумите ја опишуваат како магична и вонземна.
Има добри и одлични одбрани, но она што во саботата го приреди Гуљелмо Викарио е навистина несекојдневно.
Релативно анонимниот 26-годишен италијански голман ја игра само третата сезона во Серија А, а втора на голот на Емполи. Веќе ги освои симпатиите откако целата Чизма зборува за неговите одбрани против Рома, иако натпреварот го заврши со два гола во својата мрежа и си замина поразен од „Олимпико“.
Само што заврши паузата, се играше 47. минута кога Лоренцо Пелегрини нафрли од корнер од левата страна. Топката со глава ја расчисти дефанзивецот Себастиано Луперто, таа дојде до Пауло Дибала кој од прва со волеј шутираше, а Викарио ја запиша првата во низата од три одбрани. Од одбраната на Викарио на топката налета Џанлука Манчини кој веднаш биеше, Викарио повторно одби, падна на земја, а на топката натрча Теми Ејбрахам кој кога со глава ја удри топката сите почнаа да се радуваат. Но, Викарио со магична одбрана со ногата во вис буквално со крампоните од гол-линијата по третпат во истата акција не дозволи гол. Конечно неговите соиграчи потоа ја расчистија опасноста.
За одбраната на Викарио ќе се зборува уште долго, а оваа одбрана веројатно е и една од најдобрите во историјата на самата Серија А.
Инаку, Гуљелмо Викарио е родум од Удине каде бил во младинската академија на Удинезе, но никогаш не заиграл за првиот тим. На сениорско ниво дебитирал како позајмен за четвртолигашот Фонтанафреда во 2014 година, а потоа четири години минал во Венеција, за која бранел за време на продорот од Серија Ди преку Чи до Би. Следувала една сезона во дресот на Перуџа, по што бил купен од Каљари, со кој дебитира во Серија А. По само една сезона на Сардинија доаѓа понудата од Емполи, а во септември и прв репрезентативен повик од Роберто Манчини, но без да запише настап.
