Градоначалничката на македонската престолнина, Данела Арсовска, го најави продолжувањето на реализацијата на стопираниот проект БРТ на претходниот градоначалник Петре Шилегов.
Проектот сега Град Скопје го нарекува Брз автобуски превоз, за разлика од администрацијата на Шилегов кога се преферираше англискиот термин Bus rapid transport, односно БРТ.
„По две години отстранување на пречките на проектот предизвикани од претходното градско раководство, градот Скопје конечно ќе добие нов транспортен систем. Системот за Брз автобуски превоз доби зелено светло од меѓународните партнери со што започнува неговата реализација во главниот град. Проектот подразбира изградба на два нови терминали, на транспортни центри, обезбедување на непречено сообраќање на автобусите, како и набавка на нови еколошки автобуси кои користат ЦНГ. Во основниот идеен проект беа истакнати детектираните сериозни пречки за реализација кои благодарение на посветеноста и работата на градската администрација се надминати и со нивно отстранување се овозможува непречена реализација на овој проект“, извести Град Скопје.
Од Град Скопје истакнаа дека и покрај сите блокади продолжуваат со заложбите кои ќе им овозможат на граѓаните модерен и навремен јавен градски превоз, надминувајќи ги проблемите со кои се соочува и ЈСП и граѓаните кога станува збор за градскиот превоз. „Во нашите искрени заложби за модерен и еколошки градски превоз нема да нѐ сопрат ниту блокадите во Советот на Град Скопје ниту структурните проблеми со кои се соочува ЈСП, а се наследени од претходните раководства на претпријатието“.
„Новите еколошки автобуси и ревидираниот систем значително ќе го намалат сообраќајниот хаос во главниот град и ќе овозможат јавниот превоз да се одвива непречено, а доцнењето да биде минато. Затоа е важно сѐ што е во интерес на граѓаните да се реализира, а тие да добијат градски превоз како што доликува на главниот град“, додаваат.
