Шведската компанија IKEA и германскиот производител на автомобили Volkswagen денеска соопштија дека ќе ја прекинат работата во Русија, поради нападот на таа земја врз Украина.
IKEA соопшти дека привремено ги напушта пазарите на Русија и Белорусија и дека ќе одвои околу 41 милион долари за помош на бегалците од Украина.
„IKEA ја прекинува работата во Русија и Белорусија. Покрај тоа, IKEA и Фондот на IKEA ќе донираат повеќе од 400 милиони шведски круни во добротворни цели за да им помогнат на оние кои беа принудени да ја напуштат Украина поради војната“, се вели во соопштението.
Од IKEA изјавија дека работните места и платите на вработените ќе бидат зачувани, а на нивните семејства ќе им пружат секаква поддршка.
Германскиот производител на автомобили Volkswagen соопшти дека ќе го прекине производството на возила во Русија.
Компанијата на Twitter објави дека извозот на нејзините возила во Русија веднаш ќе биде прекинат.
Volkswagen наведе дека „многу сериозно ја сфаќа одговорноста за работниците во Русија погодени од овие мерки“ и додаде дека на сите ќе им исплати надомест за скратено работно време.