Десетици илјади приврзаници на поранешниот бразилски претседател Жаир Болсонаро вчера излегоа на улиците на Саун Пауло во знак на протест против кривичната истрага против поранешниот десничарски претседател.
Новинскиот портал G1 објави дека приврзаниците на Болсонаро марширале по Авенида Паулиста протестирајќи против истрагата за наводната вмешаност на Болсонаро во обидот за државен удар по неговиот изборен пораз во 2022 година.
Демонстрантите носеа израелски знамиња во пркос на актуелниот претседател, кој привлече критики дома поради споредувањето на израелската воена офанзива во Газа со холокаустот.
Болсонаро беше поразен од левичарскиот политичар Луис Инасио Лула да Силва во вториот круг од претседателските избори во октомври 2022 година и, наводно, бил вклучен во плановите за соборување на владата по изборната победа на Лула.
Болсонаро одби да даде изјава за време на неговото последно сослушување во федералната полиција.
„Барам смирување за да може минатото да се избрише. Мораме да најдеме начин да живееме во мир“, рече поранешниот воен офицер Болсонаро, кој исто така вееше израелско знаме и беше облечен во бразилски фудбалски дрес.
Тој повика на амнестија за неговите приврзаници, од кои некои беа осудени на долги затворски казни за напад на владиниот кварт по изборите.
На 8 јануари 2023 година, една недела откако Лула положи заклетва, приврзаниците на Болсонаро кои одбија да ја признаат неговата победа упаднаа во Конгресот, седиштето на владата и Врховниот суд во Бразилија, предизвикувајќи значителна штета.
Тие ја отфрлија неговата изборна победа и ја повикаа армијата да го собори.
Болсонаро, кој не го призна поразот, отиде во САД пред да му ја предаде власта на Лула. Нападот врз зградите на бразилската влада е бразилска верзија на нападот врз американскиот Капитол од страна на поддржувачите на поранешниот американски претседател Доналд Трамп на 6 јануари 2021 година, откако тој ги загуби изборите од демократот Џо Бајден.
Врховниот суд започна истрага против Болсонаро поради сомневање дека ги организирал немирите, што тој го негира. Изборната комисија на Бразил му забрани да се кандидира за изборна функција на осум години поради злоупотреба на моќта и медиумите пред изборите во 2022 година.
