Пред шест години беше прогласен за безнадежен случај во Дортмунд, синоќа Чиро Имобиле ѝ пресуди на Борусија.
Летото 2014 година Чиро дојде како големо засилување во Борусија откако жареше и палеше во дресот на Торино, но не се вклопи во германскиот стил и по само една полусезона си замина. Во Бундеслигата на 24 натпревари постигна само 3 голови.
„Велат дека сум бил најлошото засилување за Борусија? Понекогаш треба на играчите да им се даде време, да се сфати ситуацијата. Јас дојдов во Дортмунд во погрешен момент, кога имаше смена на генерацијата. Имав потешкотии, но сега излишно е да зборувам за тоа. Јас сум личност која внимава на сѐ, ги прифаќам пофалбите кога ме фалат, но истото го правам и со критиките“, вели голгетерот говорејќи за Sky.
Затоа, синоќа Чиро беше моторот на Лацио кој со 3:1 во Рим ја победи Борусија. Прво го отвори резултатот, а при крајот со одлична аситенција му кумуваше на третиот гол.
„Чувтсвото да се врати Лацио во Лигата на шампиони е навистина неверојатно. Едноставно има некој посебен шмек кога се излегува на терен. Навистина сме задоволни од тоа што натпреварот го одигравме перфектно“, смета Чиро.
Лацио ја доби битката, но не и војната. Ова беше прво коло и до крајот на групната фаза сѐ може да се случи. Во оваа група се уште и Зенит и Бриж.
„Групата е навистина изедначена, имаме уште пет битки до крајот, а ние мораме да продолжиме со истата желба и одлучност. Игравме против еден од најдобрите тимови во Европа, беше тежок натпревар. Ни беше потребно вакво нешто по лошото издание во саботата за да ментално да се издигнеме и да покажеме дека и сезонава ќе бидеме истите оние кои се желни за врвот“, завршува тој. Инаку, Лацио во саботата доживеа бламажа во Џенова губејќи со 3:0 од Сампдорија.
