Институтот за проучување на војната објави нова анализа и мапа на конфликтот во Украина. Подолу се клучните делови.
Руските сили ја зголемуваат употребата на психолошки и информативни операции за да го нарушат моралот на украинските војници.
Украинската генерална управа за разузнавање (GUR) на 8 јуни објави дека руските сили испраќаат заканувачки пораки до личните уреди на украинските војници, барајќи од нив да го остават оружјето, да се предадат или да застанат на страната на Русија.
GUR објави дека руските сили испраќале пораки на различни платформи, вклучувајќи СМС, Telegram, Viber, Signal и WhatsApp и дека во пораките се заканувале да им наштетат на украинските војници или членовите на нивните семејства.
Украинскиот воен експерт Дмитриј Снегиров истакна дека руските пропагандисти спроведуваат информативни и психолошки кампањи со цел да го нарушат моралот на украинските војници ширејќи информации дека Северодонецк ќе стане „следниот Мариупол“.
Украинската јужна оперативна команда извести дека руските воени сили на Крим ги фалсификуваат резултатите од задолжителните лекарски прегледи извршени за време на воената служба за да го зголемат бројот на регрути.
Руската полиција уапси маж кој фрли молотов коктел и ја запали зградата на локалната власт на Крим во знак на протест против инвазијата на Украина, што веројатно укажува на растечкото незадоволство од руските воени напори на Крим.
ISW претходно објави дека присилната мобилизација во Народната република Доњецк и Луганск ги влошува социјалните тензии и предизвикува протести во Донбас.