Интер ја оствари втората победа во новата сезона откако денеска со 5:2 славеше на гостувањето кај Беневенто.
Веднаш штом тргнаа од центарот, „Нераѕурите“ уште во 28. секунда го отворија резултатот преку Ромелу Лукаку на асистенција на Ашраф Хакими, најавувајќи ја голеадата која следуваше.
Во 25. минута Ашли Јанг го проигра Роберто Гаљардини кој зголеми на 0:2. Само три минути подоцна Гаљардини, овој опат во улиога на асистент, му сервираше на Лукаку за негов втор гол.
Домаќините се вратија во игра со голот на Џанлука Капрари во 34. минута по грешката на голманот Самир Хандановиќ кој буквално му ја додаде топката в нозе.
Разликата од три гола ја врати Мароканецот Хакими кој во 42. минути зголеми на 1:4, резултат со кој се замина на пауза.
Во вториот дел паднаа само два гола, по еден на двете страни. Во 71. минута Алексис Санчес асистираше за нововлезениот Лаутаро Мартинес за 1:5, а конечниот резултат го постави Капрари со својот втор гол.
Ова беше всушност натпревар од 1. коло кој беше одложен. Во исто време Специја на гости го совлада Удинезе со 2:0 со двата гола на Андреј Галанбинов. Нашиот Илија Несторовски настапи од 64. минута за поразената екипа.
