Синоќа почна новата сезона во Калчото, а завесата ја кренаа шампионот Милан и неговиот градски ривал и вицешампион од ланската сезона, Интер.
Во интересен натпревар на кој публиката виде дури 6 гола Милан сезоната ја почна со победа над Удинезе од 4:2. Гостите уште во 2. минута најавија дека во Милано се дојдени по изненадување бидејќи дефанзивецот Родригу Бесау ја затресе домашната мрежа. Но, Милан набрзо ја презеде контролата и со два брзи гола во 11-тата и 15. минута направи комплетен пресврт. Стрелци беа Тео Ернандес од пенал и Анте Ребиќ. Гостите сепак не се откажаа и во надополнувањето од полувремето израмнија на 2:2 преку Мароканецот Адам Мазина, погрижувајќи се на пауза да се замине со реми.
Веднаш штом почна вториот дел Брахим Диас донесе водство на Милан од 3:2, кое потоа во 68. минута Ребиќ со својот втор гол го дуплираше погодувајќи за 4:2, што потоа се покажа како конечен резултат.
Во редовите на гостите од Удине шанса да заигра на „Меаца“ не доби нашиот Илија Несторовски кој го гледаше натпреварот од клупата за резерви и не беше една од петте замени кои тренерот Андреа Сотил ги направи.
Интер сезоната ја почна со гостување на „Виа дел Маре“ стадионот кај повратникот во елитата, тимот на Лече. Уште во 2. минута Ромелу Лукаку го најави својот камбек во Серија А со гол со глава по асистенција на Матео Дармјан. Раниот погодок можеби навестуваше голеада, но до такво нешто не дојде.
Домашните израмнија три минути после паузата кога по еден контра напад Гамбиецот Асан Сесај, патем летно засилување за Лече, ја затресе интеровата мрежа. Гостите од Милано се мачеа до краот никако не успевајќи да создадат сериозна шанса кон домашниот гол, а оние удари кои успеаја да ги упатат беа одбранети од синоќа одличниот Владимиро Фалконе. Сепак, во последната четврта минута од судиското надополнување замената Дензел Думфрис погоди од блиску по нафрлувањето на Лаутаро Мартинес за победа од 2:1.
Во другите два синоќешни натпревари Аталанта стартуваше со победа кај Сампдорија од 2:0, додека дебитантот Монца не ги израдува сопствените навивачите губејќи дома од Торино со 1:2.
Денеска се среќаваат:
18:30
Фиорентина - Кремонезе
Лацио - Болоња
20:45
Салернитана Рома
Специја - Емполи
Понеделник:
18:30
Верона - Наполи
20:45
Јувентус - Сасуоло
