Иако неговиот Интер по 12 одиграни кола е на првата позиција на табелата во Серија А со два бода повеќе од второпласираниот Јувентус, тренерот на миланскиот тим, Симоне Инѕаги, сѐ уште не размислува за титулата.
Шефот на стручниот штаб на минатосезонските финалисти во Лигата на шампионите смета дека сѐ уште е рано за вакви прогнози и сака да ги ослободи играчите од дополнителен притисок.
„Не сакам да зборувам за тоа како сме фаворити за титулата. Серија А е квалитетно натпреварување, има многу натпревари кои треба да се одиграат до крајот и тоа што имаме два бода повеќе од најблискиот ривал не значи ништо. Сепак, единственото нешто што можам да им го ветам на нашите навивачи е дека ќе се бориме најдобро што можеме за да постигнеме што подобри резултати во домашното првенство, националниот куп и Лигата на шампионите“, изјави Инѕаги.
„Луѓето веруваат во нас поради начинот на кој играме, но мораме да бидеме искрени и да кажеме дека Интер не е најбогатиот тим во Италија. Ние не продаваме играчи за екстремно голема сума пари, дури и сега кога игравме во финалето на Лигата на шампионите“, рече Инзаги, па додаде:
„Од друга страна, имаме голема поддршка од навивачите, челниците на клубот се секогаш тука за тимот и играчите, така што ги имаме сите услови да работиме. Ќе се обидеме и ќе се бориме колку што можеме и ние ќе видиме за што ќе биде доволно“.
Интер синоќа со 2:0 го победи Фрозиноне на домашен терен и рутински ги освои планираните три бода. По репрезентативната пауза, понаредниот викенд следува вистинска битка за врвот на табелата бидејќи в недела на 26 ноември е Дерби д'Италија - мега пресметката Јувентус - Интер.
