Сите кои синоќа го гледаа натпреварот Ливерпул - Интер се изнадија што Един Џеко преседа на клупата не добивајќи шанса да влезе во игра. Тренерот на „Нераѕурите“ даде објаснување зошто постапил така со босанскиот голгетер.
Интер бркаше негатива од 0:2 од првиот натпревар во Милано, а во нападот Симоне Инѕаги се одлучи натпреварот да го почне со Лаутаро Мартинес и Алексис Санчес, оставајќи го Един Џеко на клупата.
Не вметнувањето на Џеко во првите 11 значеше само едно - дека Босанецот ќе влезе од клупа во второто полувреме. Но, ниту тоа не се случи бидејќи во игра во нападот влезе брзоногиот Хоакин Кореа. Веројатно на таквата одлука на Инѕаги ѝ кумуваше црвениот картон на Санчес во 63. минута.
„Имавме проблем со кондицијата откако останавме со 10 играчи. Хакан Чалханолу беше уморен, а Џеко ќе ни биде многу важен во Торино, па морав да правам некои други пресметки. Не се обидував да го заштитам резултатот од 1:0, пробував да ја одржам рамнотежата до крајот за да можеме да го загрозиме домаќинот. Жал ми е за Санчес бидејќи Ливерпул и тоа како се потресе со голот на Лаутаро и сакав да видам што ќе се случеше по тоа“, објасни Инѕаги за Sky Sport Italia.
Од неговите зборови несфатливо е зоштро во вторник би го чувал Џеко за натпревар кој се игра тек в недела вечер. Воедно, Џеко синоќа во Ливерпул ќе одиграше најмногу половина час (секако, доколку не заминеше натпреварот во продолженија).
„Секако постои големо жалење бидејќи со сите сили сакавме да влеземе во четвртфиналето. Игравме против Ливерпул кој заедно со Мначестер Сити и Баерн е моментално најдобрата екипа во Европа, и се боревме рамноправно со нив“, додаде Инѕаги.
Откако синоќа Интер доживеа елиминација од Лигата на шампионите, сега избраниците на Симоне Инѕаги ќе се сконцентрираат кон одбрана на Скудетото. Во игра се и во Копа Италија каде треба да играта реванш полуфинален натпревар со Милан.
Наредниот предизвик за Интер е гостувањето кај Торино во рамки на 29. коло од Серија А, натпревар закажан за в недела од 20:45.