Предводникот на Интер е разочаран поради кавгата која изби на теренот за време на синоќешниот натпревар на Интер кај Сампдорија помеѓу Лукаку и Барела. Како што рече, такви работи не сака да гледа на терен, особено не кога станува збор за двајца добри пријатели како нив.
Интер синоќа не успеа да дојде до трите бода во Џенова кај Сампдорија играјќи без голови откако 90 минути не успеа да го најде патот до мрежата на Емил Аудеро.
Но, она што го одбележа натпревар беше кавгата помеѓу Ромелу Лукаку и Николо Барела во првото полувреме, кога белгискиот репрезентативец се заврте кон соиграчот и му претеше да престане да мавта со рацете, а притоа искористи и навредливи зборови пцуејќи го играчот со кого дели соблекувална (навиодно му рекол figlio di puttana). Нормално, тоа воопшто не му се допадна на Инѕаги.
„Вакви работи се случуваат, иако не би требало да се случуваат на терен и не сакам да ги гледам. Но, седнаа заедно на полувремето, тие се големи приајтели. Нормално, такви инциденти не сакам да гледам на терен“, рече Симоне Инѕаги.
Што се однесува на натпреварот, Инѕаги рече дека е многу разочаран што неговиот тим не успеа да постигне гол и да дојде до победа против претпоследниот тим на табелата во Серија А.
„Се разбира дека сум разочаран, затоа што сакавме да победиме, не ја потценивме Сампдорија и требаше да оствариме подобар резултат со обѕир на бројот на шанси што ги создадовме“, истакна тој.
„Секогаш велам дека треба да се фокусираме само на себе, мораме да продложиме да работиме и дополнително да ја поправиме нашата игра“, дополни.
Наредниот калчо предизвик за Интер е в сабота од 20:45 часот кога Илија Несторовски и неговиот Удинезе ќе гостуваат на „Меаца“ во Милано, што ќе биде шанса за одмазда на Интер со оглед на тоа што на првиот натпревар во септември тимот од Удине славеше со 3:1.
