Шпанскиот репрезентативец е незадоволен од минутажата која ја добива во Реал Мадрид под водство на Зинедин Зидан, а сега и јавно се отвори за својата мака.
Франсиско Роман Аларкон Суарес, попознат едноставно како Иско, во Реал е од 2013 година кога дојде од редовите на Малага. Важеше за еден од најстандардните играчи во тимот, но уште минатата сезона неговата минутажа драстично се намали.
Според него, виновник за тоа е тренерот Зинедин Зидан.
„Кога сака да ме извади од игра, тоа го прави околу 50-60 минута од натпреварот. Понекогаш дури и на полувреме“, почна Иско да се жали говорејќи во емисијата „El Partidazo“ на каналот Movistar+.
„А, ако треба да ме стави во игра, тој тоа го прави во 80-тата минута“.
Сезонава навистина е така. Иско саботата дербито со Барса го преседа на клупата, а во претходните 4 кола двапати излезе на полувреме, еднаш во 57. минута и еднаш влезе во игра пред самиот крај. Во Лигата на шампионите дуелот со Шахтар го гледаше од клупата за резерви.
Откако Зидан е на клупата на Реал, Иско нема одиграно два натпревара еден по друг со цели 90 минути. Шпанските медиуми велат дека Зидан е незадоволен од неговиот придонес во дефанзивната страна на играта и затоа не му е во преден план.
