Еден од најскапите играчи во историјата на фудбалот, кого Челси го врати од Интер во 2021 година за 115 милиони евра, на X сподели сеќавања од тешкото детство со неговата мајка и брат Џордан во Антверпен.
„Точно се сеќавам на моментот кога банкротиравме. Сè уште се сеќавам на сликата на мајка ми пред фрижидерот и нејзиниот поглед“, ја започна животната приказна Лукаку, која не е нова, но е потсетник на сето она што 30-годишниот голгетер го поминал.
Имал 6 години и рутина: мајка му секогаш му давала млеко и леб за ужина.
„Кога си дете, не размислуваш за тоа. Еден ден дојдов да си ја земам ужинката и ја најдов мајка ми кај фрижидерот. Сѐ изгледаше нормално, но нешто недостасуваше тој ден. Таа се тресеше и знаев дека нешто недостасувало. Ми ја даде вообичаената ужинка, се насмеа. Но...“
„Мама измешала вода во млеко“, продолжи Лукаку.
„Една недела немаше пари да нѐ издржува. Јасно ми беше дека сме банкротирани. Не само сиромашни, туку банкрот. Потоа дојдов дома вечерта и немавме струја, немавме две или три недели“.
За да се капе мајка му ја загревала водата, па тој се полевал со тенџере.
„Имаше денови кога јадевме бајат леб од пекарата на крајот од улицата. Пекарот знаеше за нашата ситуација, па ѝ даваше на мајка ми леб, а таа му плаќаше на крајот на неделата. Не кажував ни збор затоа што тоа беше нашиот живот. Не сакав повеќе да ја стресувам мајка ми. Само јадев тоа што имаше. Но, му се заколнав на Бога, си ветив дека тоа ќе се смени. Знаев што морав да направам“.
Кога ја нашол мајка си во солзи, решил да го открие својот план.
„Се вратив од училиште и кога ја видов како плаче, решив да ѝ кажам: 'Мамо, сѐ ќе биде добро, ќе видиш. Ќе играм фудбал за Андерлехт и тоа ќе се случи наскоро. Ќе бидеме добро. Никогаш повеќе нема да се грижиш“, раскажува Ромелу.
И го одржал ветувањето. На шест години го забележале скаутите на Лирс, од 2004 до 2006 година постигна 121 гол на 68 натпревари и се преселил во Андерлехт. Добил стипендија, ги тероризирал младите голмани (131 гол на 93 натпревари за младинскиот тим на Андерлехт), а првиот договор со белгискиот гигант го потпиша во 2009 година. Веќе во 2011 година се пресели во Челси.
Остатокот е историја на момчето по потекло од Конго. Неговото семејство, и многу други сиромашни луѓе, бидејќи е голем активист, никогаш повеќе не беа гладни...
Ромелу Лукаку моментално тренира со младинскиот тим на Челси и чека да се реши неговото трансфер прашање. Белгискиот напаѓач очекува расплетот да се случи до крајот на неделава, а во игра се Јувентус, Рома и Ал Хилал. Шпекулациите велат дека тој сигурно ќе остане во Серија А.
