Повеќето пациенти со коронавирус создаваат антитела кои ги штитат од повторно заразување најмалку шест месеци, покажуваат резултатите од најновото истражување, пишува Guardian.
За време на истражувањето се собрани примероци од крв од над 20.200 Британци во периодот меѓу јуни и ноември 2020 година. Откриено е дека 99 отсто од оние кои биле позитивни на коронавирус имале развиено антитела за најмалку три месеци, а половина година подоцна тоа било случај кај 88 проценти.
Околу една четвртина од оние со позитивен тест (24 отсто) немале никакви симптоми, додека 40 проценти немале класични симптоми како што се температура, постојана сува кашлица или губење на вкус и мирис.
„Уште не можеме да бидеме сигурни како тоа влијае на имунитетот, но резултатите од истражувањето покажуваат дека постои заштита најмалку 6 месеци по заразата“, изјави Наоми Ален, професорка и главен научник во Biobank.
Таа вели дека резултатите од оваа студија се вклопуваат со резултатите од други студии во Велика Британија и во Исланд, а сите покажуваат дека постојат антитела кои неколку месеци може да штитат од повторно заразување, пренесе Reuters.
Анализата на примероците од крв открива дека антителата се зголемиле од 6,6 отсто на почетокот на истражувањето на 8,8 проценти на крајот од студијата.
