Италија, Грција, Малта и Кипар денеска го осудија системот за управување со миграцијата во Европската Унија, според кој носат несразмерен товар, па бараат помош од Европската комисија.
Тие четири земји „се првата почва на Европската Унија во која мигрантите влегуваат и тие мора да го понесат најтешкиот товар од мигрантскиот прилив во Медитеранот, во согласност со меѓународните обврски и прописите на Европската Унија“, велат министрите за внатрешните работи на Италија, Малта, Кипар и грчкиот министер за миграција во заедничка декларација објавена во Рим.
Тие потсетуваат на ангажманот на Европската Унија во јуни во Луксембург за воведување „механизам за доброволна солидарност“, кој треба да овозможи трансфер и преселување на 10.000 луѓе секоја година во други земји-членки на ЕУ од земјите во кои влегле.
„Механизмот е бавен“
Резултатот од спроведувањето на овој ангажман е „разочарувачки“, сметаат четирите медитерански земји. „Механизмот е бавен“, а бројката од 10.000 преселби не е остварена и „е само мал дел од илегалните пристигнувања на мигранти во текот на годината“, наведуваат оттаму.
Овие четири земји, кои поради својата географска положба се први на удар од напливот на мигранти, со години бараат да се воведе систем на задолжителен трансфер и преселување на мигрантите.
Во очекување на нов договор за управување со миграцијата „кој би бил ефикасен, праведен и траен“, четворицата министри повикуваат на „итна и неопходна дебата за тоа како подобро да се координираат операциите за спасување во Медитеранот“, така што бродовите на невладините организации што спасуваат мигранти ќе се усогласат со прописите .
„Оние под чие знаме пловат невладините организации треба да преземат одговорност“
Државите под чие знаме пловат бродовите на невладините организации кои спасуваат мигранти затоа треба да преземат целосна одговорност за нив, велат тие. Изјавата уследи по спорот меѓу Италија и Франција, кој кулминираше во петокот кога брод со 230 мигранти се закотви во француското пристаниште Тулон, откако Италија одби да му дозволи да се закотви.
„Ја повикуваме Европската комисија и претседателството да ги донесат неопходните мерки за оваа дебата“, наведуваат оттаму.
