Италијанското обвинителство побара екстрадиција на славниот бразилски фудбалер Робињо откако поранешниот играч на Милан и Реал Мадрид беше обвинет за силување.
Судот во Рим пред еден месец ја одби жалбата на поранешната ѕвезда на бразилската репрезентација, со што ја потврди деветгодишната затворска казна за силување на 22-годишна Албанка во ноќен клуб во Милано во 2013 година.
Заедно со него е осуден и неговиот пријател Рикардо Фалко, додека останатите четворица сторители на ова злосторство побегнале во Бразил и им се губи трагата.
Робињо моментално е во Бразил и Италија побара негова екстрадиција бидејќи сѐ уште не почнал да ја отслужува затворската казна.
Еден месец откако беше потврдена конечната одлука, од Робињо нема ни трага, ни глас. Затоа италијанското обвинителство побара негова екстрадиција од Бразил.
Тие побараа и меѓународна потерница за екстрадиција во Италија. Она што може да ги попречи Италијанците во намерата е тоа што Бразил има силна традиција со години да не ги екстрадира своите граѓани во други земји каде што се осудени.
Сепак, Робињо ќе биде уапсен доколку влезе во една од 70-те земји со кои Италија има договор за меѓународна потрага.