Кошаркарите на Денвер Нагетс се пласираа во полуфиналето на плеј-офот откако во серијата го совладаа Феникс Санс со 4-2. Дуелот беше решен ноќеска со убедливата победа на Нагетс од 125:100, а Никола Јокиќ повторно доминираше.
Српскиот центар забележа нов трипл-дабл (32 поени, 12 асистенции, 10 скокови) и уште еднаш на сите им покажа зошто е еден од најдобрите НБА кошаркари.
Нагетс имаат уште една серија пред борбата за прстен, односно го чекаат победникот од дуелот помеѓу Лос Анџелес Лејкерс и Голден Стејт, а таму е 3-2 за тимот од Лос Анџелес.
Шестиот натпревар утринава беше завршен уште во првата четвртина кога Нагетс водеа со 44:26, а на полувремето имаа дури 30 поени разлика.
Второто полувреме беше чиста формалност, Денвер ја контролираше играта на паркетот за да дојде до рутински триумф.
Покрај Јокиќ, во победничкиот тим се истакнаа Џамал Мареј (26 поени) и Кентавиус Колдвел-Поуп (21), а на другата страна најдобри беа Камерон Пејн (31) и Кевин Дурент (23).
Инаку, Денвер вака го повтори својот најдобар успех и по 1978, 1985, 2009 и 2020 година повторно ќе играат за големото финале.
Во источното полуфинале помеѓу Филаделфија 76ерс и Бостон Селтикс ќе се игра мајсторка откако 76ерс не ја искористија предноста на домашниот терен и загубија пред своја публика со 86:95, со што гостите од Бостон израмнија на 3-3 во партии.
Пиров беше дабл-даблот на Камерунецот Жоел Ембиид од 16 поени и 10 скокови, како и 26-те поени на Тајрис Макси, бидејќи немаа поддршка од останатите. Кај Бостон некако должностите беа добро распределени па Маркус Смарт уфрли 22 поена, Џејсон Тејтум 19, Џејлен Браун 17, а Малколм Брогдон 16.
Одлучувачкиот натпревар ќе се игра во „ТиДи Гарден“ арената во Бостон в понеделник рано сабајлето од 1:30 чаост по македонско време.
Резултати:
Филаделфија 76ерс - Бостон Селтикс 86:95 (3-3 во партии)
Феникс Санс - Денвер Нагетс 100:125 (2-4 во партии)
