Ракометарите на Вардар 1961 ја одбранија домашната титула, откако попладнево во својот завршен натпревар сезонава во македонската Суперлига го совладаа Тиквеш на домашен терен со 37:25 (18:10) во салата „Јане Сандански“ во Скопје.
Ова е јубилејна 15-та македонска титула за „Црвено-црните“, освоена во неизвесна трка со единствениот конкурент Еурофарм Пелистер, кој повторно мораше да се задоволи со второто место. Воедно, ова е и седма титула во низа.
Вардар сезоната ја заврши со двојна круна, откако претходно го совлада Еурофарм Пелистер и во финалето на националниот куп.
Дуелот против Тиквеш беше последен во „Црвено-црниот“ дрес за Оливје и Кевин Њокас, Патрик Валчак, Стефан Додиќ, Џереми Тото и Диало Бакари, кои од следната сезона нема да бидат дел од составот на Вардар.
