Вардар 1961 го победи Еурофарм Пелистер со 24:20 (12:11) во 8. коло од Супер лигата. Со овој триумф „Црвено-црните“ останаа во шампионската трка на табелата и сега имаат два бода помалку од најголемиот ривал.
Дербито во „Јане Сандански“ донесе голема борба, малку квалитетна игра и врвна партија на голманот на Вардар 1961, Мартин Томовски.
На теренот, „Црвено-црните“ први стекнаа предност од два гола уште во 10. минута, но таа предност Пелистер експресно ја анулираше. На полувреме домаќинот замина со предност од еден гол.
Во вториот дел битолчани за прв пат дојдоа до предност 19:18, а потоа и 20:19 и тука застана нивниот напад. До крајот на мечот „Зелено-белите“ речиси 15 минути не постигнаа гол, па Вардар со серија од пет гола го реши натпреварот.
Томовски со 12 одбрани (3седмерци) беше најдобар кај Вардар. Стрелците ги предводеше Јапонецот Јасукира со 6 гола (5 од седум метри), а Георгиевски, Родригес и Петриќ постигнаа по 4 гола.
Кај Еурофарм Пелистер најефикасен беше Тајник со 6 гола, додека неговиот сонардоник голманот Лесјак забележа 8 интервенции.
