И да не сте љубител на знамиња, сигурно некогаш сте приметиле дека виолетовата боја ја нема на ниту едно знаме. Ајде да видиме зошто е тоа така.
Всушност, виолетовата боја ја има, но само на едно знаме. А, и на тоа знаме е тешко приметлива бидејќи ја има во мали детали. Станува збор за знамето на островската карипска држава Доминика, за чие знаме пишувавме во претходната епизода „Многубојни знамиња“. Папагалот во центарот на знамето на оваа земја, покрај жолт клун и канџи, црвени очи, содржи и зелени и виолетови пердуви. И тоа е сѐ од виолетовата боја, а во светот има околу 200 независни држави, или со ограничена автономност.
Зошто?
Одговорот е дека не се работи за некаква теортија на заговор која има за цел да се бојкотира виолетовата боја, туку има добра причина зошто изостанува од знамињата.
Имено, до почетокот на XIX век оваа боја била премногу скапа. Поради тоа најмногу се поврзувала со моќ, власт и богаство. Интересен е на пример случајот со британската кралица Елизабета I која им забранила на сите, освен блиските членови на кралското семејство, да носат облека во оваа боја.
Историски, оригиналната виолетова боја се добивала од еден вид на мал моски еж кој го фаќале во медитеранските води на она што е денес Либан. Биле потребни околу 10 илјади моски ежови за да се направи само 1 грам виолетова боја. Токму затоа важела за боја на богатите, а не поради својот изглед. Само оние кои финансиски можеле да си ја дозволат оваа боја можеле да ја носат, а обичниот народ можел да ја види само при јавните собири на кои биле и кралевите или другите богаташи.
Низ историјата се познати интересни занимливости со виолетовата боја. На пример, римскиот владетел Аурелијан, кој владеел во III век, на својата жена ѝ забранувал да купува шалови и ѓердани со виолетова боја затоа што таквото нејзино задоволство него го чинело трипати повеќе отколку што самиот тој вредел во злато. Е толку била скапа виолетовата боја.
Одредени историски извори велат дека 350 грама виолетова боја чинела три купа злато, што во денешно време би било околу 56 илјади долари. Епа сега видете зошто дури ни најбогатите земји не можеле да си дозволат нивното знаме да има виолетова боја.
Конечно, од 1856 година виолетовата боја почнала да станува подостапна. Англискиот хемичар Вилијам Хенри Перкин сосема случајно, како и многу други пронајдоци, направил синтетичка виолетова боја додека се обидувал, пазете, да направи лек за маларија. Оттогаш почнало масовното производство на виолетова ткаенина, па кралските семејства и богаташите веќе престанале да ја вреднуваат, бидејќи станала достапна за широките маси.
