Децата треба да ги научите да јадат додека не почувствуваат ситост, а не да им се заканувате дека мора да изедат сѐ што им е сервирано во чинијата.
Важно е детето да научи да чувствува глад и да престане да јаде кога желудникот му е полн. Затоа, треба да ги заборавиме навиките да се „светне“ чинијата и да се изеде целото јадење „за да не остане“.
Експертите препорачуваат десетина совети за стекнување на здрави навики на исхрана кај децата.
Едно е да им се кажува на децата дека треба да јадат здраво и количински разумно, а сосема друго е тоа да го покажете со пример. Ако родителите јадат правилно, и децата ќе научат да јадат правилно.
Секој ден во домот имајте на дофат свежо овошје и зеленчук.
Организирајте ги главните оброци и ужинките од прилика во исто време секој ден. Децата лесно се навикуваат на рутина и тоа е добро за нивната општа дисциплина.
Вклучете ги децата во подготвувањето на храната.
Солените грицки и благото чувајте ги на највисоките и потешко достапни полици.
Заедничките семејни оброци се многу важни. Во зависност од вашите распореди, потрудете се барем два од главните оброци да ги јадете сите заедно на маса.
Јадете секогаш на маса, а не од стоење или пред телевизор/компјутер.
Пробувајте нова храна и нови вкусови. Децата нешто прифаќаат, а нешто не и тоа е во ред.
Храната треба да биде уживање и затоа семејните оброци треба да бидат пријатни. За нив треба да одвоите време и да се потрудите да бидат естетски убави, да се одвиваат во пријатна атмосфера и да бидат уживање за целото семејство.
