Словенечкиот кошаркарски ас Лука Дончиќ беше првото име на натпреварите во НБА лигата одиграни на католички Божик.
Божикниот НБА специјал започна со победата на Њујорк Никс над Милвоки Бакс од 129:122, продолжи со триумфот на Денвер Нагетс над Голден Стејт Вориорс од 120:114, потоа Бостон Селтикс славеше на гости кај Лос Анџелес Лејкерс со 126:115, а Мајами Хит ја совлада Филаделфија 76ерс на домашен терен со 119:113.
На крајот стигна шлагот на тортата - дуелот меѓу Феникс Санс и Далас Маверикс кој Лука Дончиќ го реши со партија за паметење.
Со дабл-дабл учинок Дончиќ го предводеше својот тим до победа од 128:114, постигнувајќи 50 поени со 15 асистенции, и уште еднаш покажа за каков кошаркар се работи.
Одличниот Словенец погоди 8 тројки, имаше 6 скока, 4 украдени топки и 3 блокади, а во текот на натпреварот успеа да стигне до бројката од 10.000 поени во НБА.
Дончиќ стана само четвртиот кошаркар во историјата на НБА кој постигнал 50 или повеќе поени на Божик. Само Бернард Кинг, Вилт Чембрлејн и Рик Бери го направиле тоа пред него.
За победате на Далас помогна и лошата игра на најголемите ѕвезди на Феникс. Девин Букер постигна 20, а Кевин Дјурент само 16 поени. Она што посебно изненадува е тоа што Букер шутираше само 14 пати за 40 минути, а Дјурент само 11 пати за 43 минути. Најдобар стрелец кај Феникс беше Грејсон Ален со 32 поена.
Табела: