Јадењето навечер може директно да влијае на тоа колку калории согорува нашиот организам, колку сме гладни и начинот на кој нашето тело ги складира маснотиите, откриваат истражувачите.
Научниците претходно се согласија дека постои врска помеѓу тоа кога го јадете последниот оброк во денот и зголемувањето на телесната тежина, а ново истражување даде дополнително појаснување.
Шеснаесет учесници со индекс на телесна маса во опсег на дебелина биле подложени на два шестдневни теста за време на кои нивните навики за јадење и спиење биле строго контролирани.
Во текот на еден јаделе три оброци дневно - појадок во 9 часот, ручек во 13 часот и вечера во 18 часот. Во вториот распоред, времето било поместено за неколку часа, па појадокот бил во 13 часот, ручекот во 18 часот и вечерата во 21 часот.
Примероците од крвта покажале дека 24-часовното ниво на лептин, хормон кој ни кажува кога сме сити, било пониско кога јаделе подоцна. Ова покажува дека тие биле погладни, па имале поголема веројатност да изедат повеќе, а калориите побавно се согорувале.
Студијата спроведена од истражувачите од Brigham and Women's Hospital во Бостон, Масачусетс, исто така покажа дека јадењето подоцна доведува до складирање на повеќе маснотии преку адипогенеза, а процесот што ги разградува мастите, познат како липолиза, е намален.
Во комбинација, овие промени може да го зголемат ризикот од дебелина, а со тоа и од дијабетес и рак, предупреди тимот.
Авторите на студијата, чија работа е објавена во Cell Metabolism, додадоа: „Овие наоди покажуваат конвергентни механизми со кои доцното јадење може да резултира со позитивен енергетски биланс и зголемен ризик од дебелина“.
