Комична приказна ни доаѓа од фудбалските терени во Шкотска. Не грижете се, технологијата е сè уште во прв план.
На натпревар на клубовите Инвернес Каледонијан Тистл и Ајр Јунајтед се случи прилично интересна и по малку бизарна ситуација.
Роботска камера беше задолжена за пренесување на натпреварот, односно машина опремена со вештачка интелигенција обучена за автоматско следење на топката на теренот. Сепак, се покажа дека машината е малку збунета. Наместо на топката, нејзиниот фокус беше насочен кон избричената ќелава глава на линискиот судија.
Очигледно, роботот ја помешал ќелавата глава на судијата со фудбалската топка, со што им создаде проблеми на навивачите кои не можеа да одат на трибините поради коронавирусот, па мораа да го следат преносот преку малите екрани.
Иако имаше и такви кои беа доста лути на овој пропуст, сепак повеќето од нив добро се забавуваа, судејќи според коментарите на социјалните мрежи.
Патем, само една недела порано, фудбалскиот клуб Инвернес Каледонијан Тистл гордо ја најави „технологијата за пренос со помош на вештачка интелигенција која автоматски ја следи топката и овозможува HD квалитет“.
Мораме да признаеме дека по малку ни е жал што ова не се случи во времето на Пјерлуиџи Колина, бидејќи веројатно не знаеме што ќе беше позабавно – преносот на натпреварот или реакцијата на Колина потоа?