Стресот е болест на 21 век, а може да биде предизвикан од различни проблеми кои ги има модерниот човек. Се лекува со различни методи, посета на терапевт, на одмор или во природа, а во Сеул се прави на малку поинаков начин.
Со изолирање против стрес
Некои луѓе во Јужна Кореја се толку многу под стрес што плаќаат за да посетуваат затворени простори каде можат да се изолираат и не прават ништо. Овој тренд станува популарен во Сеул, па така кафулето Green Lab во близина на шума им овозможува на посетителите да резервираат термини во мирниот простор на објектот.
Во оваа просторија, која гледа на бујната вегетација на Сеулската шума, посетителите мора да ги остават мобилните и да се воздржат од разговор со другите луѓе.
„Тешко е да се најде простор во корејското општество каде е прифатливо да не правите нешто“, вели еден од вработените во кафулето.
Луѓето се повеќе се заинтересирани за ваквиот вид ослободување од стресот, но би требало уште време за да стане популарен, пишува Washington Post.
Има уште едно место во Сеул каде може да побегнете од луѓе и да ја испразните главата од мисли. Тоа се кината кои имаат посебни содржини за оние кои сакаат мирно искуство.
Така, киното Магабок во Сеул месецов продаваше билети од 6 долари за филм кој е симулација на 40-минутно возење со авион.
Јужна Кореја е позната по брзиот начин на живот каде суровата реалност на растечките долгови и недостапните домови секојдневно земаат данок меѓу младите луѓе. Korea Herald објави резултати од анкетирани 1.016 жители на Јужна Кореја од кои 70% се под стрес, а 46,5 проценти на млади луѓе од дваесетина години изјавиле дека се депресивни.