Врз основа на остатоци пронајдени во мало шишенце старо околу две илјади години, научници успеале да реконструираат рецепт по кој древните Римјани правеле парфеми.
При изградба на базен во градот Кармона во Шпанија во 2019 година, сосема случајно и ненадејно бил откриен влез во подземна просторија. Се покажало дека станува збор за римска гробница од I век од новата ера, а археологот Хуан Мануел Роман од Универзитетот „Пабло де Олавиде“ во Севиља бил првиот што ја испитал просторијата, која речиси 2.000 години стоела недопрена.
Покрај човечки и разни други останки, тој открил и мало шишенце од горски кристал (најпознат вид на кварц) во кое имало стврдната состојка со непозната содржина. Заинтригиран, решил подетално да го испита ова ретко откритие. Испаднало дека е парфем, а за да ги направи работите поинтересни - тимот успеал и да го реконструира рецептот и да ја открие главната мирисна нота.
Сè што досега знаеле научниците за парфемите на старите Римјани доаѓало од пишани извори, што е извор на информации кои често знаат да бидат кратки и нецелосни. Сепак, од нив се добиени некои основни информации, како на пример дека се направени од различни масла - но не и од алкохол. Меѓутоа, новото истражување покажа дека во испитаниот материјал се присутни двете компоненти.
Откривањето на сесквитерпени во масата јасно укажува дека парфемот содржел есенцијално масло, додека понатамошните истражувања покажале дека е добиен од растението Pogostemon Cablin, односно од индискиот пачули. Мирисот веројатно го носел некој од членовите на семејството закопани во гробницата. Материјалот од кој е направен малиот сад за парфем им помогнал на научниците да претпостават дека семејството е богато - бидејќи горскиот кристал во тоа време се сметал за луксузен материјал.
Од древниот Египет, преку античка Хелада, парфемот го нашол својот пат до Римјаните. Записите за тоа како Римјаните користеле миризливи води и тинктури датираат од II век п.н.е., а според Роман и неговите колеги, ова откритие укажува дека тие користеле парфеми не само во секојдневниот живот, туку и во посебни прилики како што се погреби.
Резултатите од истражувањето се објавени во списанието Heritage.
