Антоан Гризман остана шокиран од одлуката на селекторот Дидје Дешан, Килјан Мбапе да биде нов капитен на француската репрезентација.
Напаѓачот на Атлетико се надеваше дека неговата улога во соблекувалната и трофеите ќе му ја донесат капитенската лента, но се покажа поинаку. Беше објавено и дека тој ќе ја преиспита својата одлука да продолжи да игра за националниот тим.
Од активните играчи, Оливје Жиру, кој е само четири години постар, има повеќе настапи за Франција отколку Гризман. Жиру има 120, три повеќе од неговиот 32-годишен соиграч. Неколку дена подоцна, пред натпреварот меѓу Франција и Холандија во квалификациите за Европското првенство, ситуацијата се смири.
L'Équipe пишува дека Мбапе го повикал Гризман на разговор по одлуката да го наследи Иго Љорис на капитенското место.
Му кажал дека разбира од каде е разочарувањето и му порача да смета на него како еден од најважните играчи на Франција на претстојните натпревари. Тој наводно додал дека „можеш да бидеш лидер и без лента околу раката“. Средбата завршила со насмевки, се заклучува.