Португалскиот фудбалер Кристијано Роналдо се најде на удар на јавноста откако повторно ја фрли капитенската лента по синоќешниот пораз од Шпанија, а за слабата форма се огласи и Антонио Касано.
Поранешниот репрезентативец на Италија се осврна на една од полошите игри на Роналдо за Португалија во последните години.
„Во овој момент Роналдо треба да си направи услуга и да сфати дека ако не си на одредено ниво, тогаш треба да одлучиш да престанеш. Освои сè, беше феномен. Доста! Мора да застанеш или ќе слеташ на клупа“, изјави во негов стил поранешниот играч на Реал Мадрид говорејќи за Cabine Desportiva.
Инаку, Касано играше во мадридскиот клуб две години пред доаѓањето на Роналдо во 2009 година.
Да потсетиме, Португалија го имаше првото место во групата во свои раце, исто како и неодамна против Србија во мундијалските квалификации, но на самиот крајот на натпреварот примија гол од Шпанија и претрпеа пораз од 1:0.
Поради тоа Португалците останаа без пласман во фајнл-фор турнирот од Лигата на нации, каде сега ќе игра Шпанија.