Ако ги погледнеме извештаите од европскиот пазар на половни автомобили, просечната цена на половни автомобили собори историски рекорд, сегашните цени се повисоки за околу 12 отсто, а експертите посочуваат дека до крајот на годината ќе ја пробијат границата од 25.000 евра.
Економската криза не го заобиколи ниту овој пазар, откупувачите неминовно ги чувствуваат последиците, а засега нема индиции дека ќе се стабилизира во блиска иднина.
Цените на половните автомобили почнаа да растат на почетокот на минатата година. Прво, скокнаа за 10%, како резултат на пандемијата и последователниот пад на побарувачката, а потоа и подрастично во текот на летото. На почетокот на оваа година набавката на одредени модели беше за 20 до 30 отсто поскапа од вообичаеното.
Трендот на пазарот на половни автомобили се вжешти оваа година со појавата на информации дека, покрај пандемијата, ќе има неколку поскапувања предизвикани од други фактори, како што се промените на законот во Германија и недостигот на чипови на глобалниот пазар. Практично, автомобилите кои чинат околу 7.000 евра, кога сè ќе се собере, поскапеа за речиси 4.000 евра.
Се додава дека во меѓувреме побарувачката е зголемена бидејќи некои нови автомобили сега имаат рок на испорака од една година, што ги прави користените автомобили попривлечни. Состојбата на пазарот полека се подобрува, иако цените сè уште растат, па доколку продолжи трендот на пораст, просечната цена на половните автомобили на крајот на годината ќе надмине 25.000 евра на европскиот пазар.
Побарувачката за половни автомобили се зголемува и ја надминува понудата, па просечната цена во Европа за едно возило во ноември изнесувала 24.772 евра. Тоа е за речиси 12 отсто повеќе од пред една година и највисоко откако се води статистика.
