Роверот Perseverance, најнапредното роботско возило досега испратено на Марс, со себе го поведе и првото автономно летало, малиот хеликоптер Ingenuity.
Ако сè оди според планот на НАСА, Ingenuity ќе стане првото летало кое се вивнало во воздух на некоја друга планета, а со себе ќе носи и дел од авионот на браќата Рајт, кој за првпат полетал на нашата планета.
Викендов беа завршени подготовките за испуштање на хеликоптерот од роверот, Perseverance го приземји малото летало на одреденото место погодно за полетување и слетување и испрати фотографија на Земјата.
Ingenuity сега треба да ги подготви своите системи и да прими инструкции за лет. Тоа ќе потрае околу една недела, па хеликоптерот нема да полета во следните неколку дена.
Предвидено е да биде самостоен и оперативен околу 30 дена од одвојувањето со роверот. Во тоа време би требало да изврши еден или повеќе тест летови. Првите од нив ќе се состојат од вертикално полетување, лебдење во траење меѓу 20 до 30 секунди и слетување. Ако сè мине во ред, ќе се обиде и со поамбициозни летови, на поголеми висини.
Целта на мисијата е да се истражи дали на Марс има услови за летање како што тоа го замислуваат од НАСА, а откако хеликоптерот ќе ги изврши тест летовите, роверот Perseverance ќе се врати на основните, научни задачи.
