Кинески воени научници сметаат дека Кина мора да развие можност за онеспособување или уништување на сателитската мрежа Starlink, што е во сопственост на SpaceX.
Научниците ја истакнаа можноста Starlink да се користи во воени цели кои би можеле да им помогнат на другите земји да бидат закана за националната безбедност на Кина. Затоа, повикуваат на развој на антисателитски можности вклучително и можности за физичко уништување на проектот.
Научниците предложија развој на надзорен систем кој може да го следи секој Starlink сателит. Со тоа би се решил еден проблем, а тоа е можноста за лансирање на воен товар заедно со останатите сателити кои се дел од констелацијата.
Кинеската војска предупреди и на опасноста што ја претставува интернет мрежата:
„И додека Starlink тврди дека е цивилна програма која нуди услуги за брз интернет, всушност има силна воена позадина“, се наведува во военото кинеско списание.
Местата за лансирање се наоѓаат во воени бази, а SpaceX претходно доби средства од Американските воздухопловни сили за да проучува како Starlink сателитите можат да се поврзат со воени авиони под енкрипција, тврдат кинеските научници.
Тие предупредија дека Starlink може да ја забрза комуникацијата на борбените авиони и дроновите за повеќе од 100 пати.
Статијата на научниците насловена како „The Development Status of Starlink and Its Countermeasures“ беше објавена во списанието Modern Defence Technology, но подоцна е тргната и објвена на друг сајт и содржи можни методи за уништување на сателитите.