Лос Анџелес Клиперс поведе против Денвер Нагетс со 2-1 во победи по 113:107 во третиот натпревар од полуфиналната серија во Западната конференција.
Неизвесност во дуелот гледавме до самиот крај, откако Клиперс стигнаа 12 поени негатива во средината на втората четвртина и седум во средината на последниот дел.
На пет минути пред звукот на сирена, Денвер имаше водство од 101:99, но поголемото искуство на тимот од Лос Анџелес и непрецизните удари на „грутките“ на крајот донесоа победа за „ножиците“.
Пол Џорџ беше најдобар стрелец кај Лос Анџелес Клиперс со 32 поенa, додека Каваи Ленард заврши со 23 поени и 14 скока. Никола Јокиќ забележа 32 поени, 12 скока и 8 асистенции кај Денвер, додека Мајкл Портер јуниор остана со 18 поени и 10 скока.
Бостон Селтикс пак се доближи на само победа од елиминација на шампионот на НБА лигата, Торонто Репторс и пласман во финалето на Источната конференција откако „келтите“ го освоија дуелот бр.5 од серијата со 111-89 и поведоа со 3-2.
Во натпревар каде тимот од Бостон целосно ја имаше контролата, најдобар стрелец беше Џејлен Браунс со 27 поени. Бекот Камба Вокер додаде 21 поен, додека Џејсон Тејтум помогна со 18 поени и 10 скока.
За Торонто, Фред Ванфлит постигна 18 поени, додека 16 додаде резервата Норман Пауел.
