Земјотресот со епицентар во Турција силно го погоди и северот на Сирија, но за разлика од бројната помош која се упати кон Турција, преку јужната граница сликата е поинаква.
Разрушена од граѓанската војна, но и од онаа со ИСИС, Сирија како да немаше доволно маки па сега ја погодија и два разорни земјотреси, истите што уништија десетина градови кај северниот сосед Турција.
И додека светот се организира како да ѝ помогне на Турција, Сирија воглавно остана на страна, и натаму под санкции. Некои сепак заминаа и таму да помогнат.
Досега е потврдено дека прва помош во Сирија пристигнала од Иран, Русија, Египет, Алжир, Ирак, Кина, Пакистан, Либан, Јордан, Тунис, Оман, Бахреин, ОАЕ, Судан, Мавританија и, внимавајте, Северна Кореја.
Од синоќа до денес на оваа листа се приклучија и Унгарија, Венецуела, Ерменија, Индија, Либија, Саудиска Арабија и, внимавајте уште еднаш, Авганистан.
Кога е најпотребно, дури и режими како оние на Ким Џонг-ун и на талибанците праќаат хуманитарна помош.
„Исламскиот емират на Авганистан... објавува пакет помош од 10 милиони авгани (111.024 долари) и 5 милиони авгани (55.512 американски долари) за Турција и Сирија, соодветно, врз основа на заедничката хуманост и исламското братство“, соопшти МНР на Авганистан.
Министерот за надворешни работи на Венецуела, Иван Хил, итно ја повика меѓународната заедница да ги крене санкциите врз Сирија за да може што побрзо да пристигне бројна помош.
Во меѓувреме, сирискиот Министер за надворешни работи, Фајсал Микдад, ги обвини САД дека нивните санкции врз земјата спречиле проток на неопходната помош во разурнатите градови.
Помош за Сирија најави и Шкотска.
И други европски земји, меѓу кои и Македонија, веќе собираат средства за помош и на Сирија, но наметнатите санкции претставуваат проблем како сето тоа да се достави до таму.
