Многу европски фудбалски гиганти ја отфрлија идејата за потенцијално приклучување во Суперлигата веднаш откако Европскиот суд на правдата пресуди во корист на натпреварувањето, а против УЕФА и ФИФА.
Вчерашниот ден во светот на фудбалот може да биде важен за целата иднина. Европскиот суд на правдата одлучи дека УЕФА и ФИФА постапиле спротивно на законот за натпреварување со блокирање на формирањето на Суперлигата во 2021 година.
Тоа значи дека Суперлигата веќе нема никакви пречки и дека фудбалот може засекогаш да се промени. Сепак, писмата за одбивање од светот на фудбалот пристигнаа уште првиот ден, а бројни великани одбија да учествуваат во натпреварувањето кое допрва треба да се формира.
Четири од шесте најголеми англиски клубови одбија да играат во Супер лигата. Прв тоа го направи Манчестер Јунајтед, а потоа следуваа Манчестер Сити, Челси, Арсенал и Тотенхем. Интересно е тоа што Ливерпул сѐ уште не се огласил.
По нив следеа бројни европски гиганти како Баерн, Пари Сен-Жермен, Интер, Борусија Дортмунд, Атлетико, Севиља, Валенсија, Реал Сосиедад, Виљареал, Селтик, Аталанта, Порто, Монако, Фејнорд и Рома кои се огласија и официјално објавија дека нема да учествуваат во Суперлигата до моментот на објавување на овој текст.
И не само тие, туку и некои помали клубови објавија дека нема да бидат дел од Суперлигата и дека стојат зад натпреварувањата на УЕФА и ФИФА, како на пример италијанскиот третолигаш Пескара и македонскиот Работнички.
Така, Реал Мадрид и Барселона остануваат единствените клубови кои се исклучиво со Суперлигата. Доста галама, крена претседателот на Наполи, Аурелио Де Лаурентис, кој ја поддржува Суперлигата, но клубот официјално нема излезено со став.
Неколку гиганти сѐ уште не се огласиле, а под лупа се италијанските Јувентус и Милан. Се разбира, Јувентус беше еден од организаторите на Суперлигата во 2021 година, но во меѓувреме се откажа од проектот, а ја промени и управата. Сега ги чекаме двата најголеми италијански клуба да дадат официјално соопштение за ова прашање.
Ова оди во прилог на вчерашната изјава на првиот човек на УЕФА, Александер Чеферин: „Можат да прават што сакаат. Се надевам дека ќе имаат прекрасно натпреварување со само два клуба“.
