Третиот ден од Светското првенство го донесе најголемиот шок на турнирот досега. Во првото коло од групата Ц, Саудиска Арабија ја совлада фаворизираната Аргентина со сензационален пресврт од 2:1.
Тимот во кој главна ѕвезда е Лионел Меси е вториот фаворит за освојување на Мундијалот или барем тоа беше пред почетокот на натпреварувањето. Првиот е Бразил.
Од друга страна, Саудиска Арабија е аутсајдер. Затоа пред натпреварот обложувалниците понудија коефициент од 1,20 за победа на Аргентина и големи 25 за победа на Саудиска Арабија. Значи, ако некој плати, да речеме, 100 евра за победата на Саудиска Арабија, тој би добил околу 2.050 евра по одбивањето на даноците.
Аргентина, како и Саудиска Арабија, имаат уште два натпревари. Тие ќе играат против Полска и Мексико, кои денеска од 17 часот одиграа 0:0. Саудиска Арабија моментално е прва во групата, а Аргентина е моментално последна.