Повеќето стручњаци се согласуваат дека консумирањето на сувомеснати производи може да го загрози здравјето, но што точно значи поголема количина?
Сувомеснатите производи, како што е куленот, саламите, колбасите и останатите месни преработки, често се на мета на стручњаците, бидејќи нивниот состав често е „мистерија”.
Студијата спроведена на Институтот за кардиоваскуларни и мозочни болести во Хамилтон во Канада, покажала дека само 150 грама месни преработки неделно може да го зголемат ризикот од кардиоваскуларни заболувања или прерана смрт, пренесуваат канадските медиуми.
Во споредба со луѓето кои не јадат обработено месо, оние кои јадат 150 грама неделно имаат 46% поголеми шанси да развијат некои од овие заболувања и дури 51% поголем ризик од прерана смрт, вели Машид Деган, авторка на студијата.
Тие 150 грама се отприлика два помали колбаси или едно мало пакување сланина. Помалку од ова наводно не го зголемува ризикот. Студијата опфатила дури 135.000 луѓе од вкупно 21 држава и нивното здравје е следено во текот на 10 години. Резултатите се објавени во публикацијата "American Јournal of Clinical Nutrition”.
